9.4. GIMPressionist

Førehandsvising

Førehandsvisinga syner ikkje endringane i biletet før du har trykt på knappen Oppdater. Dette rett og slett fordi filteret bruker så mykje datakraft at det ville seinka arbeidet stendig å måtte oppdatera i tillegg. Skulle du kome for langt ut på viddene, kan du alltid bruke knappen Nullstill for å setje alle parametra tilbake til “fabrikkinnstillingane”.

Førehandsinnstillingar

Filteret “GIMPressionist” har mange ulike innstillingar. I tillegg kan desse innstillingane kombinerast og såleis gi nesten uteljande mange ulike påverknader på biletet. Difor er det også viktig å lagra eventuelle interessante innstillingar du måtte kome fram til. Det er uråd å hugse alle kombinasjonane. Sidan utvalet er så stort, er det også vanskeleg å vite på førehand kva resultatet blir.

  • Lagra innstillingane: Bruk dialogboksen til venstre for denne knappen til å gi innstillingane eit namn. Du kan også lage ei kort beskriving i dialogvindauget som dukkar opp.

  • Bruk: Trykk på denne knappen for å hente parametra for den valde førehandsinnstillinga i lista.

  • Slett: Trykk på denne knappen for å slette den valde førehandsinnstillinga i lista. Du kan bare slette innstillingar du har laga eller lagt inn sjølv.

  • Oppfrisk: Oppdaterer lista over førehandsinnstillingar.

Fanen “Papir

I denne fanen kan du velje teksturen på biletoverflata frå lista med ferdiglaga teksturane. Strukturen for den valde teksturen blir vist i ei førehandsvising.

Inverter

Inverterer den valde teksturen slik at det som før såg ut som ei hole nå ser ut som ein hump, og omvendt.

Overlegg

Den valde teksturen blir lagt over biletet som eit gjennomsiktig papir i staden for å påverka biletet direkte.

Skalering

Denne glidebrytaren bestemmer storleiken på teksturen i prosent av originalen. 100% betyr at mønsteret blir det same som vist i førehandsvisinga.

Relieff

Med denne glidebrytaren bestemmer du styrken på teksturen, altså kor mykje teksturen skal vere synleg i biletet.

Fanen “Pensel

I denne fanen finn du alle “reiskapa” som blir brukte for å male på biletet. Du finn her ei liste over alle tilgjengelege “penslar” og ei førehandsvising av den valde penselen.

Gamma

Den lille glidebrytaren blir brukt for å velje gammaverdi for den valde penselen. Gammaverdiane påverkar lysverdien i midttonene i biletet.

Vel

Det er også råd å bruke eigne bilete som penslar. Einaste kravet er at biletet må vere synleg på skjermen før du opnar filteret. Naturlegvis bør slike bilete ver nokså små for å få ein brukbar effekt.

Dersom biletet du bruker har fleire biletlag, vil kvart av desse bli vist i utvalslista, og i førehandsvisinga dersom laget er aktivisert, og kan bli brukt som pensel.

Du kan lagra den aktiviserte penselen ved å trykke på knappen Lagra som.

Sideforhold

Denne glidebrytaren blir brukt for å bestemma forholdet mellom høgde og breidde for penselen. Den minste verdien (-1,0) set penselen til full horisontal breidde og neste ikkje høgde. Maksimalverdien (1,0) gjer penselen mykje høgare i høve til breidda. Forandringane blir viste i førehandsvisinga.

Relieff

Her bestemmer du mengda av farge for kvart strøk. Høge verdiar kan gi ein effekt av å legge på maling med palettkniv.

Fanen “Orientering

Dei innstillingane som påverkar orienteringa av penselstrøka er samla i denne fanen. Ved å variera strøkretninga vil biletet bli meir likt slik ein malar gjer det.

Fanen “Storleik

I denne fanen er alle innstillingane som verkar inn på storleiken til penslane samla. Du kan også setje avgrensingar, og i tillegg velje kva som skal styre storleikane.

Fanen “Plassering

I denne fanen kan du bestemme korleis penselstrøka skal fordelast i biletet.

Plassering

Når det gjeld måten å plassera penselstrøka på, har du to val:

  • Tilfeldig : Med dette valet blir penselstrøka fordelt tilfeldig i biletet. Dette gir ei meir realistisk teikning.

  • Likt fordelt: Med dette valet blir penselstrøka likt fordelt utover heile biletet.

Dekkevne

Bestemmer kor tett malinga skal vere. Med liten dekkevne vil papiret eller bakgrunnen vere synleg i område som ikkje er dekka av penselstrøk.

Orientert rundt midtpunktet

Konsentrer penselstrøka omkring sentrum av biletet.

Fanen “Farge

Denne fanen blir brukt for å bestemme kva som skal styre penselfargen.

Farge

Du kan setje strøkfargen på to måtar:

  • Gjennomsnitt under penselen: Penselfargen blir gjennomsnittet av alle pikslane under penselen.

  • Midten av penselen: Penselfargen blir henta frå den pikselen som er under midten av penselen.

Fargestøy

Her kan du setje til støy i fargen for å gjere han mindre homogen.

Fanen “Generelt

I denne fanen kan du bestemme kva som skal vere bakgrunnen i biletet. I tillegg styrer du også relieffverknaden for penselen frå denne fanen.

Bakgrunn

Her bestemmer du korleis den delen av biletet som ikkje blir dekka, heilt eller delvis, med penselstrøka skal sjå ut. Du har følgjande val:

  • Behald original: Det originale biletet blir brukt som bakgrunn.

  • Frå papir: Bruk teksturen i det valde papiret som bakgrunn.

  • Einsfarga: Her kan du velje bakgrunnsfarge ved å klikke på fargeruta.

  • Transparent: Bruker ein gjennomsiktig (transparent) bakgrunn. Bare dei malte penselstrøka vil vere synlege. Dette valet er bare tilgjengeleg dersom biletet har ein alfakanal.

Teikna kantane

Dersom denne er aktivisert, vil det bli teikna ein smal kant rundt penselstrøket.

Saumlaus

Dersom denne er aktivisert, vil biletet kunne flisleggast utan synlege saumar mellom bileta. (Flislegging er å legge mange kopiar av biletet ved sida og over kvarandre for å dekke eit større område). Høgresida vil passe til venstresida og botnen til toppen. Dette er spesielt nyttig dersom du bruker biletet som bakgrunn på ei nettside.

Skygge

Legg ein skyggeeffekt til penselstrøka.

Formørk ved kanten

Denne glidebrytaren bestemmer kor mykje kanten av strøket skal gjerast mørkare for kvart strok. Ein høg verdi gjer at relieffverknaden av strøka blir større.

Skyggeformørking

Denne glidebrytaren bestemmer kor mykje skyggen av strøket skal gjerast mørkare for kvart strok.

Skyggedjupn

Denne glidebrytaren bestemmer kor langt ut frå objektet skyggen skal nå.

Skyggesløring

Denne glidebrytaren bestemmer kor mykje skyggen skal slørast.

Avviksgrense

Dette er ein grenseverdi for kor store avvik som skal føre til reaksjonar der valet av m.a. penselstorleikar blir bestemt ut frå andre verdiar i biletet.